【鏟草男女】葡軍想踢世盃該棄穩守突擊



【鏟草男女】葡軍想踢世盃該棄穩守突擊

【Now Sports】作為一個葡萄牙迷,見到葡軍國際賽期失利,有啲想像唔到葡萄牙會缺席下屆世界盃。當然,依家都未係定局嘅......下年3月先有答案。

撰文:June

葡萄牙其實喺呢輪國際賽只要兩場贏一場,或者和兩場波就可以直接出線世界盃決賽周,但葡萄牙總係鍾意行一條驚險嘅路......例如2014嘅世界盃同埋2020歐國盃,葡萄牙都需要踢附加賽先可以得到一個席位。

當然大家(包括我)都話如果今年3月上個循環對爾維亞時, 基斯坦奴朗拿度入嘅一球,球證判入球有效或者有VAR,葡萄牙已經出咗線。但事實係歐洲區嘅資格賽,輸一場就足以跌入附加賽區。下年3月,12 隊會爭奪3個席位,有2016年歐國盃冠軍葡萄牙,同應屆冠軍意大利;當中更有唔少歐國盃表現出色嘅勁旅,如瑞典,烏克蘭,捷克等。而今次嘅附加賽係每次一場過,兩場決定生死(有啲似歐洲國家聯賽)。

如果下年3月葡萄牙想拎到世界盃入場劵,我諗教練費蘭度山度士要放棄以前嘅穩守突擊戰術。

以前穩守突擊係因為當年冇咩出色嘅進攻球員(防守其實都唔係特別好),只係得C朗同蘭尼兩個攻擊點,好多時C朗無人駁腳要自己由中場自己帶波去到前場,但依家葡萄牙咁多進攻球員,其實應該好好運用。

睇返葡萄牙剛剛對塞爾維亞場波,喺90分鐘俾米祖域絕殺。可能因為葡萄牙只需要1分都可以出線,所以最後10分鐘變成防守唔再進攻,收起咗入波嘅山齊士,而失波後再換返進攻球員施華出嚟,返魂乏術。見到C朗失落嘅樣,我嗰日都唔敢再睇有關葡萄牙嘅報道。

其實好多球迷都認為應該要進攻,可以用多啲搶點,做更好嘅組織嚟進攻。結果葡萄牙小心得滯,只係防守反而俾咗機會米祖域,佢賽後仲拎咗罐可樂出嚟錫咗一啖......

網絡數據指,未有C朗之前,葡萄牙只係入過世界盃3次,有C朗之後暫時葡萄牙都未缺席過世界盃(4次)。我都希望山度士可以好好變陣,帶領葡萄牙,拎到世界盃決賽周嘅席位,完成C朗話2022世界盃係佢最後一次參賽嘅願望。

撰文:June

旅皇迷一名。喜歡旅行,喜歡足球;享受在場邊搖旗吶喊,經歷足球的喜怒哀樂。

圖片來源 : ©AFP



Categories: 體育新聞

Tags: ,,,,,,