【Now Sports】周六英超，車路士作客輕鬆以3:0挫下李斯特城，續排榜首。
車路士中場曼治病癒復出，與哈伐斯、赫臣奧度爾組成鋒線，射手添姆雲拿也回歸戰陣，先列後備，盧卡古則繼續避戰。李斯特城以哈菲班尼斯、陸文支援單箭頭華迪。
開賽僅4分鐘，因倒戈被噓的捷維爾殺入禁區，勁射中楣彈出，李城大難不死。捷維爾在14分鐘再接再厲，開出角球予魯迪加頂入，車仔先開紀錄。10分鐘後，干堤（N'Golo Kante）在禁區邊轟入靚波，藍戰士半場領先2:0。
車仔在易邊後繼續佔優，赫臣奧度爾左路發難，捷維爾起腳省中人，卡斯柏舒米高反應快救出。61分鐘，赫臣奧度爾連過3關後推大位施射高出。在華Dee錯失良機後，車路士憑佩利錫近門撞入埋齋，大勝李城3:0。
圖片來源 : ©AFP
