【十三短打】蘇B真係咁差…..?



【十三短打】蘇B真係咁差…..?

【Now Sports】要走嘅始終要走,之前嘅地獄賽序未搞得佢死,估唔到同佢埋單嘅係對屈福特嘅大敗,蘇斯克查落台,呢3年曼聯真係枉過?

撰文:球十三

簡單講,曼聯隊波真係難教,鑲滿歷史光輝,以前太輝煌啦,個個都擺脫唔到費Sir陰影,魔迷期望大。仲記得蘇斯克查初上任只係「頂更」,但喺歐聯帶隊波奇蹟反勝巴黎聖日耳門令佢坐正,當時球迷幾興奮?

唔係為佢講好話,但客觀成績唔比其他後「費Sir年代」嘅名帥差。英國傳媒話佢戰術守舊冇變化,強如雲高爾、摩連奴落台時何嘗唔係得到類似評語?蘇B前屆帶隊波全部盃賽入4強,去屆終於入到歐霸決賽飲恨,而聯賽得到亞軍(呢幾年曼城利記車仔等太勁啦),遺恨係差個冠軍。

基斯坦奴朗拿度回歸,幾乎令所有魔迷瘋狂,但「C」來「B」嘅結局,去好似由佢落實回巢而確定,十三當時同唔少人一樣,斷言最感煩惱嘅就係蘇B,見佢呢幾個月喺場邊木無表情,對自己前景,或者一早心中有數。C朗當然世無匹敵,但冇辦法唔以佢為重心,蘇B過去幾年嘗試經營嘅年青化路線,打亂晒。

「派唔派C朗落場」根本係冇得揀。C朗回歸,成為蘇B失飯碗嘅催化劑,當然接連不敵利物浦、曼城亦令會方對佢失信心,終於借呢次對屈福特大敗向佢開刀。對宿敵慘敗當然難堪,但話就話C朗係舊將,佢回歸隊波簡直係重整,新軍被所謂同級球隊大敗,冇意外。

曼聯前景點?邊個掌帥最合適?傳媒嚟嚟去去傳嗰幾位,個人相信施丹會係深慶得人。始終有個人魅力又壓得住場,之前教皇家馬德里戰績好。最緊要係佢同C朗合作過,曼聯又有幾個法國人應該肯聽吓佢支笛。

圖片來源 : ©AFP



Categories: 體育新聞

Tags: ,,,,,,,,,,,,,