【Now Sports】上個月，西甲頭幾位仲係3分之爭，而剛剛星期四凌晨，皇家馬德里主場以1:0贏畢爾包後，已經喺西甲以7分領先緊皇家蘇斯達同踢少場嘅馬德里體育會。安察洛堤賽後佢表示連贏7場唔係好彩，而係韌力。
撰文：June
唔知大家有冇印象，安察洛堤喺2014/15年任教皇馬，曾經有過22場連勝嘅紀錄，而呢個紀錄到2020/21年先俾拜仁以23場打破。今季皇馬踢20場只係輸咗兩場，安察洛堤絕對唔係靠運，但當然有球迷都唔滿意皇馬下半場捱打。
安察洛堤就解釋，畢爾包係一支優秀球隊，冇踢歐洲賽，而且比皇馬休息多兩日，上半場趁大家有體力時把握機會，下半場雖然辛苦啲，但佢反而比較滿意。佢表示自己覺得開心，因為有韌力，捱得都係皇馬嘅優點，無論技術，精神，同埋踢逆境波嘅能力，都係非常重要。球員可以一齊捱打，捱得嚟又唔失波其實好難，所以安察洛堤多謝門將古圖爾斯嘅撲救。
佢所謂嘅捱得，其實都係皇馬精神嚟。啲人成日問我皇馬精神係咩？就係各皇迷都會見過嘅呢一句："Hasta el final, vamos Real!"
呢度嘅final 唔係解作決賽，而係解最後，字面翻譯就係「直到（比賽嘅）最後，去吧皇馬（加油）！」呢句就係提醒球員同球迷，未完場前都要撐落去！估計應該同依家好興嘅一句，「搏盡無悔」差唔多！
撰文：June
旅皇迷一名。喜歡旅行，喜歡足球；享受在場邊搖旗吶喊，經歷足球的喜怒哀樂。
圖片來源 : ©AFP
