皇馬球迷會女會長:封王似坐過山車



皇馬球迷會女會長:封王似坐過山車

【Now Sports】皇家馬德里提早奪得西甲冠軍,我們找來皇家馬德里香港球迷會會長June大談愛隊封王感受,她坦言,感覺猶如坐過山車。

問:對愛隊封王有咩感想?

June:贏西甲當然好開心啦!印象中我睇皇家馬德里咁耐,好似冇試過早咁多輪就奪冠,心情興奮!奪冠後,有好好心情備戰歐聯4強次回合(對曼城)。我哋落後一球,但返到主場希望有力逆轉,進入歐聯決賽就更加好。

問:講吓封王關鍵戰役?

June:我覺得係近排對西維爾(贏3:2)嗰場,都幾深刻,因為一開始落後0:2,要洛迪高同埋拿祖追和,然而賓斯馬補時階段「反吸」,都幾激動。點解我覺得咁關鍵?上季都因為對西維爾場波出現問題手球,有一邊被判手球,有一邊冇被判手球,施丹好嬲。嗰場我哋和咗波,冇咗兩分之後失去贏西甲冠軍主導權,最後一場要贏之餘仲期望馬德里體育和或者輸,我哋至有得贏西甲,個故事最後大家都知,係馬體會贏。今季咁樣贏關鍵戰役,好開心。

問:仲有咩難忘片段?

June:有啲似坐過山車。我記得寫過一啲關於安察洛堤嘅入球數,佢真係激活咗雲尼素斯,令到佢同賓斯馬好夾,頭幾場好多入球,大家都好開心好期待。至於點解講過山車?球迷開始發現出嚟出去都係嗰班人,就懷疑佢哋開始有啲攰,少少跌watt,開始有啲危機,而前排有人又好似覺得安察洛堤麻麻地;然後去到依家幾場大逆轉,令我哋啲士氣又增加番......,好似又高又低嘅過山車,到星期六贏波,有好嘅收尾。

問:有咩封王功臣?

June:賓斯馬就一定唔使講,佢真係好出色同埋慢慢可以擔起成隊波。另外就係摩迪,呢兩個都係關鍵角色。另一個少人提係古圖奧斯,佢守住大門都好重要,咁仲有我哋嘅巴西孖寶啦......,講講吓講成隊。至於幕後功臣,我自己心裡都好多謝安察洛堤肯返嚟教皇馬,因為我當初都諗唔到有邊個可以教。雖然都係嗰句,佢換人方針可能令大家好忟憎,但其實佢戰術運用好出色,你見到今季有好多反勝,所以佢能夠令球員沉得住氣,打到逆境波,呢個係上季未必做到嘅事。另一個幕後功臣係體能教練Antonio Pintus,佢今季加入好多新嘅訓練,例如我哋見到球員跑步嘅時候會戴啲特製口罩,應該係一啲氧氣罩去做啲體能訓練,令到球員傷患少咗好多。真係要多謝佢,令球員今季可以健健康康踢到尾。

問:球迷會有咩慶祝活動?

June:我記得兩年前都答過呢個問題,因為疫情關係所以冇得慶祝。本來想搞睇波,而亦都因為疫情所以冇辦法進行任何踢波活動。睇吓有冇機會一齊食餐飯!噚晚,我哋都有約埋一齊開zoom睇波。之後幾場波都好夜,所以未必再約到一齊睇。我哋下個月打算去捐血做慈善應援,大家都可以留意球迷會宣佈,一齊支持。

皇家馬德里香港球迷會

https://www.facebook.com/realmadridhkfc/

圖片來源 : 受訪者提供



Categories: 體育新聞

Tags: ,,,,,,,,,,,