【Now Sports】做人化學，踢波都係，唔夠7個月前，阿古路喺最後一次披曼城戰衣出賽，起孖告別，我諗包括佢自己在內，冇人諗到唔夠7月後就告別球員生涯。
撰文 ：球十三
阿古路（Sergio Aguero）有幾勁？呢幾日傳媒鋪天蓋地講，唔重複，十三最難忘，亦相信係曼城球迷最難忘，肯定佢喺2011/12年煞科戰絕殺奪冠球波。英超吸引，只因「劇力逼人」，當日煞科戰況峰迴路轉，原以為曼城同錦標擦身而過，偏偏藉迪斯高同阿古路補時先後入波，反勝來訪的昆士柏流浪3:2，憑得失球差力壓同時間小勝新特蘭1:0嘅死敵曼聯。
阿古路喺補時3分鐘嘅奠勝球，緊要啦，曼城轉化為富貴兵團幾年後終首奪英超錦標，亦係球會44年嚟首個頂級聯賽冠軍，別具象徵意義。相信喺城迷眼中，呢個波嘅重要性，等同曼聯躉睇當年蘇B歐聯絕殺拜仁慕尼黑成為3冠王嗰一球，都係永誌難忘。
打後日子至今，唔可以話曼城已建立王朝，畢竟之後曼聯短暫復辟送別費Sir，而車仔同利記都贏過冠軍，但當年嘅稱霸，肯定奠定藍月嘅霸者地位，所以有劃時代嘅意義。
講返佢掛靴，當知悉佢心臟有事，都想像到佢會決定掛靴。一來佢近年已經花好多時間喺球場以外嘅事，二來呢幾個月發生太多事啦，就講阿根廷贏美洲國家盃實際上好似唔係好關佢事、以為喺巴塞隆拿同老友美斯拍住上事與願違，再加埋巴塞陣營一直瀰漫不安氣氛，最重要係命仔緊要，試問佢點唔意興闌珊，點會搵命搏？
點都好，巴迪斯圖達之後，美斯以外，如果要搵一個阿根廷近代具代表性嘅鋒將，我仲係會諗起阿古路。
相關片段：
圖片來源 : ©AFP
