【Now Sports】由於我係由世界盃開始認識足球，所以夢想係要睇一次世界盃決賽！而2018俄羅斯世界盃，我有幸完成人生bucket list 其中一大項目。上次遊歷之後，間中都會有人pm問我世界盃門票嘅資訊。今日可以解答大家部份問題，第一輪嘅2022世界盃門票已經開始預售（即日至2月8號）！
撰文：June
邊度買門票？
雖然唔知會唔會因為疫情唔可以去到卡塔爾，但大家有興趣都不妨先去FIFA官網https://www.fifa.com/tournaments/mens/worldcup/qatar2022 之後選Tickets。FIFA要登入先睇到門票內容，如果你冇喺FIFA 買過門票，你要先申請一個account。
門票幾種有咩分別？
登入後，會睇到今屆世界盃可以抽嘅門票有3種：
1.逐場比賽抽，1-64場自選，呢個就多唔解釋。
2.跟國家隊抽，上屆某啲國家隊會有限制國民（葡萄牙）/國家隊球迷會會員（德國）優先，今屆第一輪就所有人都可以直接抽國家隊門票。佢分3場、4場同7場咁抽，3場你所選嘅代表隊嘅3場分組賽，4場就加埋16強，7場就加埋8強至決賽。因為無論無嗰隊入唔入到16強至決賽你都會需要買埋張門票，決賽一票難求底下，抽中7場嘅難度應該好高，大家要考慮清楚。
3.第3種門票比較特別，我不專業翻譯叫佢做「4個場館門票」，佢嘅安排係每一日一個場館1場分組，有部份係連續4日，有部分係六日中間隔開兩日，所以會好趕。但四日可以睇到4場世界盃比賽，對於繁忙又珍惜假期嘅香港人嚟講，可能都係一個好選擇。
講咁耐，咁點登記抽嘅呢？
先講登記，登記係需要大家實名登記自己同埋同行人士嘅資料，包括出身日期及證件號碼，上一屆每場只可以登記四個人，今屆我見到每場可以登記六個人。大家可以約埋朋友一齊抽，抽到嘅機會就會大啲。當年我同兩位朋友一齊抽，開幕戰就抽到7場門票，分組賽4張，而決賽就抽到3張。抽到天地飛咁到底點搞好？ 我就係咁去咗俄羅斯一個月，但非常值得！下次再講下我最後睇咗幾多場，邊幾場，同點計劃行程！所以大家唔使擔心，抽咗一次先，拎下經驗，因為唔係咁容易抽，而之後會有第2輪都可以再抽，甚至當地先買都得。下次再同大家分享多啲。
June喺度預祝大家虎年進步、身體健康、萬事如意、疫情快啲完、繼續睇好波！
撰文：June
旅皇迷一名。喜歡旅行，喜歡足球；享受在場邊搖旗吶喊，經歷足球的喜怒哀樂。
圖片來源 : 筆者提供
