【Now Sports】上星期樂高（Lego）出咗第3個球場系列，LEGO 10299「皇家馬德里．班拿貝球場」，慶祝皇馬3月6號嘅120周年及班拿貝落成75周年。因為班拿貝球場已經翻新中，盒中模型，變成咗各皇馬迷嘅回憶。
撰文：June
小妹有幸第一日就收到呢盒「珍藏」，好想同大家分享一下。貴為樂高十大最多組件之一（第8位），佢有成5876塊（比魯營多300塊，比奧脫福多1900塊），開箱一下真係嚇親，佢係我砌過最多組件嘅樂高模型。(有興趣可以睇June嘅開箱片，連結於文章後。)
暫時只係完成咗8成，但已經感受到佢咁多組件，係因為想仔細還原班拿貝外型。班拿貝外面有大型柱躉，低層同古典外牆源自1945年設計，其間一直加建到現時有天花外貌。每砌到一個位，我就有「嘩！我去過呢度影相！我坐過呢排！」之類嘅感覺。
睇過3位樂高大師嘅review，都直言3個球場模型入面班拿貝係最有趣，就係因為佢古典外型同襯色（而且我覺得佢係LEGO第3個球場模型，砌法都有改進）。當然，如果大家唔係皇馬或者樂高大建築物嘅粉絲，佢嘅價錢同埋香港嘅土地問題會令大家卻步，但不妨去專門店睇下實物打個卡。
LEGO班拿貝開箱片：
撰文：June
旅皇迷一名。喜歡旅行，喜歡足球；享受在場邊搖旗吶喊，經歷足球的喜怒哀樂。
歡迎瀏覽球十三fb專頁若得到波友一個like就是我們團隊的一大鼓舞：
www.facebook.com/ballthirteen
圖片來源 : 筆者提供
